La vschinauncha da S-chanf
ho üna surfatscha territoriela da 138.03 km²
ed appartegna tar las vschinaunchas las pü grandas da la Svizra. Ella
es situeda al cunfin traunter l’Engiadina Bassa e l’Engiadin’Ota e
cunfinescha cun Zuoz, Zernez, Tavo ed impü
vers ost eir cun l’Italia. Politicamaing oriento vers l’Engiadin’Ota
ho S-chanf eir strets contacts cun Zernez, impustüt tres las activiteds
turisticas, ils implaunts electrics scu eir il Parc Naziunel.
S-chanf ho 741 abitants, da quels
145
iffaunts e giuvenils, üna scoulina e la scoula primara a S-chanf e la
scoul’ota e’l gimnasi a Zuoz.
Ils
sectuors economics as scumpartan sün l’agricultura, l'uffizi
forestel, intrapraisas
privatas, il turissem, scu eir sün plazzas da lavur da la
Confederaziun (la plazza da la FLAB es daspö decennis staziuneda a
S-chanf, scu eir indrizs industriels scu p.ex la sarinera
e'ls implaunts electrics). Grazcha ad üna buna politica da terrain
ho S-chanf pussibilto i’ls ultims 20 ans ad üna buna dunzaina
famiglias da’s fabricher üna chesa e
rester in vschinauncha.
S-chanf ho mantgnieu ün aspet tradiziunel ed ho evito
da’s fer dependent memma ferm dal turissem e da l’industria da
fabrica culs affers immobiliers.
Attracziun speciela gioda da sted il Parc Naziunel scu eir
bgeras pussibilteds per gitas sül vast territori scu p.ex. Val
Susauna, Val Chaschauna, Griatschouls) e d’inviern la loipa da
passlung cun l'evenimaint culminant, il böt dal maraton da
skis engiadinais.
Il
president cumünel
Duri Campell
|
